Knattspyrnufélag ÍA

Á lokahófi yngri flokka ár hvert eru veittir Donna- og Stínubikar til efnilegustu leikmenn yngri flokka ÍA. Donna- og Stínubikararnir eru sérstök heiðursverðlaun sem eru veitt leikmönnum sem uppfylla ekki bara knattspyrnuhæfileika heldur ennig að viðkomandi sé góð fyrirmynd, sýni metnað, góða ástundun og góða framkomu innan vallar sem utan.

Donnabikarinn er afhentur efnilegasta leikmanni yngri flokka karla og var fyrst afhentur árið 1983. Donna bikarinn er gefinn af fjölskyldu Donna, sem hét fullu nafni Halldór Sigurbjörnsson, en hann var burðarás í fyrsta Gullaldarliði Skagamanna. Hann lék 110 leiki fyrir Skagamenn og 8 leiki fyrir Íslands hönd.

Stínubikarinn er afhentur efnilegasta leikmanni yngri flokka kvenna og var fyrst afhentur árið 2015. Stínubikarinn er nefndur í höfuðið á Kristínu Aðalsteinsdóttur, Stínu, sem er fyrsta landsliðskona ÍA. Kristín var burðarás í liði ÍA í kringum 1980 og lék sinn fyrsta landsleik 1981. Stínubikarinn var fyrst afhentur árið 2015 og  á að vera hvatning til ungra stelpna að stefna hátt.Gefandi bikarsins var fyrirtækið Þorgeir og Ellert hf.