Leikdagur í 1. deild kvenna: ÍA – Keflavík

Við erum svo spennt að láta þetta ganga í boltanum að næsta leik í 1. deildinni hefur verið FLÝTT um heila fimm daga. Hann mun s.s. fara fram í kvöld, fimmtudaginn 1. júní, kl. 19:15. Andstæðingurinn að þessu sinni eru Keflavíkurstúlkur. Þetta verður æsispennandi viðureign en bæði lið eru með 6 stig eftir 3 leiki og sitja í 3. og 4. sæti deildarinnar, þar sem Skagastúlkur eru ofar á markamun.

Þetta endurspeglast ágætlega í síðustu innbyrðisviðureignum liðanna, en liðin hafa þegar mæst tvisvar á þessu ári. Keflavík hafði betur í Faxaflóamótinu í janúar en ÍA í Lengjubikarnum í mars. Annars eru allt í allt til skráðar 27 viðureignir, þar sem ÍA hefur unnið 18, Keflavík 7 og aðeins 2 jafntefli hafa litið dagsins ljós. Markatalan stendur í 83-38 fyrir ÍA.

Með sigri í kvöld gætu Skagastúlkur náð að lyfta sér í toppsætið, a.m.k. tímabundið, þar sem toppliðin tvö spila sína leiki í þessari umferð á sunnudag og mánudag.

Við hvetjum að sjálfsögðu alla til að mæta á völlinn og hvetja stelpurnar til dáða, en fyrir þau ykkar sem ekki eigið heimangengt bendum við á beina útsendingu hjá snillingunum á ÍA TV

Áfram ÍA